Amzer, emezit-hu?

Abaoe ma’z on krog da studial micher an diorroer sport ne ran nemet redek war e lerc’h. Anzav a ran ne’m eus ket amzer da lenn ken e brezhoneg, pe dost, rak kalz a labour « skol » zo d’ober. Addeskiñ kontañ (betek 8 dreist-holl), deskiñ kontañ en ur gomz eus traoù all, kontañ en ur gomz ha war lusk ar sonerezh, displegañ ervat ar pezh zo d’ober, penaos lakaat ar c’horf (n’oc’h ket evit empentiñ pegen diaes eo lakaat unan bennak d’ober ur jestr pe ur fiñvadenn bennak. Re ziresis e vez an nen re alies ha traoù droch a zeu diwar-se)… Ha komz kreñv evit bezañ klevet betek penn all ar sal, ha reiñ c’hoant ha nerzh-kalon d’an dud.

Dek miz am eus evit deskiñ diazez ar vicher met deskiñ a vicher da vat a vo graet goude. Ra zeuin a-benn da vezañ ur gourdoner a-feson!

Araokadennoù

Me o’n em brientiñ da zibradañ ur varrenn 130kg a bouez enni.

Emaon gant ma sizhunvezh diwezhañ em c’helc’hiad « nerzh ». A-benn dilun e stagin gant ur c’helc’hiad pliometriezh, un afer all eo avat.

Evit ma c’helc’hiad nerzh em boa graet gant ar reizhad 6*6 da lavaret eo 6 steudad 6 arreadenn evit pep embregadenn. Da skouer evit ar plegadennoù divhar: 110kg 6 arreadenn * 6 steudad gant 3 munut diskuizh etre pep steudad.

Dec’h e oan bet laouen oc’h ober 3 steudad gant ar pouez uc’hek am boa gallet sevel en dibradañ e dibenn miz Mezheven.

Gouzout a ran n’eo ket kalz a dra, kredit ac’hanon, dister a-walc’h eo ar pouez-se e bed an embregerezh-korf. Ar pezh zo mat avat ha talvoudus evit ar mizioù a zeu eo ne’m eus ket tapet ma live uhelañ. Mont war-raok a c’hallan evel ma’m boa gwelet dec’h e-pad ma gourdonerezh.

G.S: dav e vo din goulenn digant tud tennañ poltridi ac’hanon pa c’hourdonan peotramant e vo borodus amañ…

 

 

Gourdonerezh an deiz

An deiz all e oan o lammat gant ar gordenn ha n’on ket bet evit ober tremenoù doubl (pe double unders ma fell deoc’h). Koulskoude em boa prenet ur gordenn a-ratozh, unan skañv hag a dro buan. Ya, ar gordenn a ra, me avat, ne oan ket evit lammat evel ma oa dleet. Re bonner e oan. Tarzhder a rae diouer din. Un dipit. Hiziv eta on aet da c’hourdonañ evit kaout muioc’h a darzhder.

Continuer la lecture de « Gourdonerezh an deiz »

Gouzout pelec’h emaon ganti

Dibradañ 130kg

Ur wech bennak e buhez ur sportour e rank hemañ gouzout pelec’h emañ ganti. Petra a dalvez kement-se evidon, da skouer? N’eo ket diaes: gouzout pet kilogramm e c’hallan sevel ur wech hepken e pep embregerezh diaezez.

Setu eta m’hon eus kemeret amzer, Vincent, gourdoner e sal L’Orange Bleue e Komborn, ha me evit klask ma 1AU (pe Arreadenn Uc’hek). Continuer la lecture de « Gouzout pelec’h emaon ganti »

C’hoarioù nerzh Breizh

D’ar Sadorn 08 a viz Ebrel e oan bet e Mousterfil e Le Cârouj d’ober un abadenn c’hoarioù nerzh. Siwazh din ne oa bet abadenn c’hourdonañ ebet gant skipailh S.A.B 35 pa ne oa den dibres ebet war-bouez Jessica. He zrugarekaat a ran evit ar weladenn hag evit bezañ diskouezet din an holl c’hoarioù zo en ti: c’hoarioù kilhoù a bep seurt (lod na’m boa gwelet gwech ebet a-raok, paledoù, bouloù… (Sellit ouzh ar skeudennaoueg da heul).

Goude se he devoa komzet din eus ar 7 c’hoari a ya d’ober Sportoù Atleterezh Breizh:

  • Gwerniañ ar berchenn
  • An ahel karr
  • Ar maen-pouez
  • Ar vazh-yod,
  • Ar sach fun
  • Ar voutelenn
  • Ar redadeg gant ur samm

Ne’m boa ket graet pep tra. Chomet e oan gant pevar c’hoari ha me ‘lâr deoc’h em boa bet bec’h. Pell e oan eus ar pezh a vez goulennet a-benn kemer perzh e kampionad Breizh. Peadra avat da reiñ c’hoant din da vont pelloc’h gant ar c’hoarioù-se ha da lakaat ma anv er c’hlub.

Ne gomprenan ket perak ez eus ken nebeut a vrud gant ar c’hoarioù-se. Neblec’h ne vez lakaet ar gaoz warne. Marteze e rankfe an traoù mont war vicherelaat evel m’eo bet graet gant Bodadeg ar gouren? Stummañ tud zo d’ober evit gallout ren gourdonerezhioù a-zoare ha neket chom gant amatourien (pegen barrek e vefent evel atletourien) ma fell dimp reiñ ul lufr nevez d’ar c’hoarioù kozh-se.  Pa weler ar berzh a ra ar c’hoarioù nerzh e Skos, en Euskadi hag e broioù all eus Europa ez eus peadra da vezañ chalet gant koll c’hoarioù Breizh.

Siwazh din ne c’hallin ket kemer perzh e kamponiad Il-ha-Gwilen hevlene na mont da welet kamponiad Breizh 2017 e deroù miz Eost a vo dalc’het kostez Blaen (e Saint Omer de Blain, kaer am eus bet klask an anv brezhonek, ne’m eus ket kavet). Ur blijadur e vefe din avat klask kemer perzh er c’hampionad e 2018. Evit se e vo ret din gourdonañ rak evel ma’m boa lavaret uheloc’h: bec’h am boa bet.

Ar pezh a blijfe din eo e vefe kement a vrud gant ar c’hoarioù-se ha ma’z eus gant ar gouren bremañ. Hag ar pezh a vefe mat ivez eo ober muioc’h gant ar brezhoneg. Pa weler n’eus ger brezhonek ebet e load an FNSAB estroc’h evit anvioù ar c’hoarioù… labour zo c’hoazh.

Un nebeud skeudennoù ma fall deoc’h ha kit da c’houzout hiroc’h e load La Jaupitre

 

Pleustriñ

Gouzout a rit emaon o’n em brientiñ evit bezañ degemeret en ur stummadur « BPJEPS Activités de la Forme ». Tro am eus bet d’en lavaret amañ c’hoazh, met randoniñ a gavan mat!
Gourdoniñ a ran bemdez. E-tro 9e pe 10e a embregerezh-korf bep sizhun.

Lun Meurzh Merc’her Yaou Gwener Sadorn Sul
Pazenn (Step)
Kof ha peñsoù
Kein
Pazenn (live 2)
Hapkido Pazenn
Dañs aervevat
Divhar
Hapkido Bruched Redek

Ret eo din anzav e santan n’on ket yaouank ken. Diaesoc’h din diskuizhañ ha dastum nerzh. Ha perak ne vefe ket pa zeu an trubuilhoù pemdez war ma spered da virout ouzhin a gousket abred da skouer. Moarvat e ouzoc’h holl petra eo: labour, bugale, fakturennoù… N’eo ket evit kelo-se avat ne rank ket an nen mont da heul e vennozh hag ober evit ma teuy e c’hoant da wir.

 

Continuer la lecture de « Pleustriñ »

Tanijenn-yalc’h

Tanijenn-yalc’h

Evezhiadenn: kemmet eo bet ar pennad-mañ da heul ur postel zo bet kaset din. Al lennerez he deus e gaset din a gave abeg — gant gwir abeg :p — er ger « yalc’hfo » am boa savet evit treiñ ar galleg « bursite ».

Petra eo un danijenn-yalc’h? Termenet e vefe evel-henn en ur geriadur emichañs: gor, koeñv poanius en ur yalc’h levrus. N’oc’h ket avañsetoc’h? Ma, diwar danijenn e teu dourenn dindan ar penn-glin hag en-dro dezhañ ken e koeñv al lodenn-se eus ar c’horf. Diaes e teu plegañ ar c’har da vezañ. Netra d’ober estreget chom hep fiñval re ha pakañ louzoù evit distanañ. Continuer la lecture de « Tanijenn-yalc’h »

Erru eo kozh 2016!

Ya, erru eo kozh ar bloaz. Ha ken nebeut a dra zo bet skrivet amañ ar bloaz-mañ c’hoazh. Ret eo lavaret e vezan tapet gant labourioù a bep seurt; gant daou dra dreist-holl: treiñ L’île mystérieuse e brezhoneg ha… klask cheñch micher. Emichañs e ouzoc’h kement-se dija rak rouez an dud a zeu amañ ha na vent ket mignoned din e Facebook pe Twitter. Soñjomp er re rouez-se avat ha displegomp un tamm. Da heul ur bilañs barregezhioù ez eo deuet anat e felle din mont etrezek bed an embregerezh-korf da labourat. Setu ma klaskin tapout ur BPJEPS evit mont da coach (pe diorroer sport, ma fell deoc’h). N’eus netra graet c’hoazh rak dav eo din e vefe asantet ma Ehan Stummañ Hiniennel ha, dre-se, arc’hantaouet ma stummadur.
Ma, an arc’hant zo un dra, gallout mont da vezañ stummet zo un dra all rak n’eo ket n’eus forzh piv a c’hall heuliañ ur stummadur, arnodennoù mont tre zo. Ar rumm kentañ zo termenet gant maodiernezh ar sport, hag un eil rumm gant pep kreizenn stummañ. N’eo ket diaes deoc’h intent eta e vezan o c’hourdonañ ken lies ha bemdez: kigennerezh, step (pazenn), LIA (Low Impact Aerobic), hep disoñjal an hapkido (c’hoant am eus da dapout ma gouriz ruz hevlene!). Etre 7 ha 10 eurvezh embregerezh-korf bep sizhun.
Setu e vez diaes din dont amañ da skrivañ un dra bennak…

Daoust ha dedennet e vefec’h gant ar pezh a ran evit en em lakaat e par da vezañ degemeret en ur greizenn stummañ? Alies e kontan an traoù em c’hont Instagram (@stefansport) pe e Facebook. Ma fell deoc’h avat e c’hallfen en ober amañ un tammig gwelloc’h eget an notennoù berr a ran er rouedadoù meneget. Warc’hoazh, da skouer, emaon o vont d’ur stummadur dizarbenn ha sikour keodedel live 1 (DSK1 *netra da welet gant ar politiker hudur!*). Ma fell deoc’h reiñ ho soñj… grit hardizh! 🙂

Al Liamm niv. 418

 

An deiz all e Gouel al levrioù e Breizh e Karaez e oa deuet ur skrivagner ha treuzyezher da lavaret din: « Lennet em eus da danevell en Al Liamm. » . Ha me ha respont dezhañ neuze: « Petore danevell? » Souezhet e oan, ne ouien ket e vije embannet ken abred ma skrid.  Setu eta, ma fell deoc’h lenn Dindan zouar, an danevell am boa kaset da gKLT e Montroulez da-geñver ur genstrivadeg skridoù evit ar grennarded, ret eo deoc’h prenañ Al Liamm. Ha ma n’oc’h ket koumanantet c’hoazh… Petra emaoc’h o c’hortoz?

Tro ho po ivez da lenn barzhonegoù gant Patrick Drean, danevelloù gant Dewi Siberil ha Gael Briand ha meur a dra all c’hoazh. Kit da load Al Liamm da lenn taolenn an niverenn hag ali Morgan Tremel.

Dediañ Pepper ha Carrot

Setu troioù-kaer Pepper, un danvez sorserez un tamm diampart met lemm he spered, ha Carrot, he c’hazh orañjez, gwidreüs un tamm hag ur penn farsour anezhañ!
Ganet e spered David Revoy e oa posubl, betek-henn, kavout hon daou haroz war internet hepken. E brezhoneg d’an nebeutañ. Setu bremañ o zroioù-kaer war baper!
Ha diwallit, n’int ket deut o-unan: Sorserezed, ur c’hazh-nij, un aerouant-vuoc’h, hag ur bern boudoù hud c’hoazh a zo war o lerc’h.
Da lenn nemet ma n’ho peus ket aon da vezañ strobinellet!

Degas a ran da soñj deoc’h e vin d’ar Sadorn 29 ha d’ar Sul 30 e Gouel al levrioù e Karaez evit dediañ ma zroidigezh eus Pepper ha Carrot. Deuit ‘ta da varvailhat ganin :)!